Waandishi watakiwa kuwa Daraja

Imetumwa : December 9th, 2017

Kaimu Mganga Mkuu wa Mkoa wa Mbeya Dkt Yahya  Msuya amewataka waandishi wa habari  kuwa daraja  la kufikisha  wananchi elimu juu ya mapambano dhidi ya Kipindupindu katika Halmashauri za Mkoa wa Mbeya.

Akiongea katika semina ya kudhibiti kipindupindu ya waandishi wa habari  wa radio   Dkt. Msuya amesema kuwa Mkoa umeendelea  kukabiliana na Kipindupindu katika Halmashauri za Mbarali na Chunya.

Dkt.  Msuya amesema kuwa katika kufikia mafanikio yaliyopatikana katika kudhibiti ugonjwa huu Mkoa umetumia mbinu mbalimbali ikiwa pamoja na kuimarisha eneo la tiba pamoja na kinga.

" Eneo la tiba limehusisha kuandaa maeneo ya kupokelea wagonjwa na kuwa na watumishi wa kutosha  katika maeneo hayo, kutoa huduma stakihi, kuwa na dawa za kutosha." Dkt. Msuya

Dkt. Msuya amesema kuwa Mkoa umepanga kuimarisha Mkakati Kipindupindu kwa kushirikisha vyombo vya Habari na Viongozi wa Serikali na Siasa ili kuendelea kutoa elimu kwa wananchi ya jinsi ya kupambana na Kipindupindu.

Akichangia  katika semina hiyo Mwandishi Yosia Sinkala ameshauri  Mkoa kuandaa mikutano  ya hadhara kuanzia ngazi ya vijiji Mitaa na Kata kwa ajili ya  kutoa elimu jinsi ya kupambana na  ugonjwa wa Kipindupindu.

Bw. Sinkala amesema kuwa viongozi wa Vijiji na Kata wana ushawishi kwa wananchi wao hivyo ni muhimu kuwashirikisha kutoa elimu hiyo kwa wananchi ya mapambano dhidi  ya Kipindupindu na pia kutarahisisha utoaji wa taarifa ya wagonjwa.

Naye Bw. Ezekiel  Kamanga wa Ebony Fm ameshauri kuwa waandishi waandae vipindi mbalimbali katika  redio kuhusu jinsi ya kupambana  na Kipindupindu na kuandaa makala mbalimbali za redio kuhusu uginjwa huo.

Bw. Kamanga amesema kuwa  waandishi watatembelea  maeneo mbalimbali yaliyoathirika na ugonjwa wa kipindupindu na kuandaa makala ambazo watazirusha katika  redio na kuwawezesha wananchi kuanza kujilinda na ugonjwa huo.

Aidha, Samuel Mhando wa Dream Fm kashauri kuandaa dawati katika ngazi  ya Kata na Vijiji yatakayohusisha wananchi  na Wataalamu wa Afya  ambao watakuwa wanasimamia  utoaji  wa elimu kuhusu Kipindupindu katika maeneo Yao.