Mkuu wa Mkoa wa Mbeya Apokea Vyumba vya Madarasa kutoka Bioland

Imetumwa : February 14th, 2018

MKUU wa Mkoa wa Mbeya,Amos Makalla amepokea vyumba viwili vya madarasa na kimoja cha Ofisi ya walimu vilivyojengwa kwa msaada mkubwa wa Kampuni inayojishughulisha na unuzuzi wa zao la Kakao wilayani Kyela ya Kim’s chocolate(Belgium) Bioland International katika Shule ya msingi Ngana iliyopo wilayani hapa.

Mhe Makalla pia amepokea madarasa vyumba viwili vya madarasa vilivyojengwa na Kampuni hiyo katika Shule ya Msingi Lubele iliyopo katika kata ya Ikimba.

Kwa mujibu wa Afisa Elimu Msingi wa Halmashauri ya Wilaya ya Kyela,Mwalimu Polemone Ndarugiliye ujenzi wa vyumba vitatu katika shule ya msingi Ngana ulioambatana na ukarabati wa vyumba vingine viwili shuleni hapo uligharimu Shilingi 23,271,000 ambapo kampuni ya Bioland ilichangia Shilingi 17,000,000 sawa na asilimia 73.1,wananchi Shilingi 5,128,000 sawa na asilimia 22 kupitia nguvu kazi.

Mwalimu Ndarugiliye amesema Serikali kupitia fedha za mfuko wa jimbo ilichangia shilingi 600,000 sawa na asilimia 2.6 na Shule ya Msingi Ngana kupitia fedha za ruzuku ikachangia Shilingi 534,000 sawa na asilimia 2.3.

Amesema kwa Ujenzi wa vyumba viwili vya madarasa katika Shule ya msingi Lubele uliogharimu Jumla ya Shilingi 14,756,500 mchango wa Kampuni hiyo ni Shilingi 9,821,000,wananchi kupitia nguvu kazi Shilingi 4,352,000,Diwani Shilingi 682,000 na madhehebu mbalimbali ya dini Shilingi 201,000.

Akizungumza mara baada ya kupokea msaada huo,Makalla aliwataka wakazi wilayani hapa kuendelea kushirikiana kwa karibu na Kampuni hiyo kwakuwa inaonyesha jitihada nzuri za kuboresha miundombinu ya Elimu.

Kwa upande wake Afisa kutoka Kampuni ya Bioland,Fons Maex amesema kampuni bado ina utayari wa kuendelea kusaidia ujenzi na ukarabati wa miundombinu ya elimu katika Shule zote za msingi zilizopo kwenye Halmashauri za Kyela,Rungwe na Busokelo.