Tengenezeni Mazingira mazuri ya Uwekezaji - Kigahe

Imetumwa : January 26th, 2022

Kauli  hiyo imetolewa leo na Naibu Waziri wa Viwanda na Biashara, Mhe. Exaud Kigahe alipokuwa anafungua kikao cha Kamati za Ulinzi na Usalama za Mikoa ya Nyanda za Juu Kusini kilichofanyika katika ukumbi wa Benki Kuu ya Tanzania, Kanda ya Mbeya.

“Tanzania ni miongoni mwa nchi zilizosaini makubaliano ya kufanya biashara bila mipaka barani Afrika na kwamba tangu kusainiwa kwa mkataba huo Watanzania wanaruhusiwa kufanya biashara zao  ndani na nje ya mipaka ya Nchi.” Alisema Kigahe.

Mhe. Kigahe aliwashauri viongozi hao kutengeneza mazingira mazuri ya uwekezaji kupitia fursa mbalimbali zilizopo katika Mikoa hiyo kama vile bandari za Itunge, Kiwira, Kasanga na Kalema ambazo  zinatumika na wafanyabiashara wa ndani na nje kusafirisha bidhaa zao.

Pia, Mwenyekiti wa Wakuu wa Mikoa Nyanda za juu ambaye pia ni Mkuu wa Mkoa wa Mbeya, Mhe. Juma Homera alisema kikao hicho kina tija katika kuleta maendeleo kwa wananchi kupitia fursa mbalimbali za kibiashara na  kilimo ili kuwakwamua wananchi katika wimbi la umasikini kwa kunufaika na uwekezaji  kupitia mipaka mbalimbali ya nchi.

“Ushirikiano wa kibiashara  katika mataifa mbalimbali sio mzuri na kikao hiki ni muhimu kujadili  mambo ya kufanya ili  kuwezesha Wananchi kufanya shughuli zao bila tatizo lolote ukilinganisha na ilivyo sasa ambapo bado kuna tatizo”. Alisema Homera

Wakuu wa Mikoa nane na Wakuu wa Vyombo vya Ulinzi na Usalama,  wameshiriki katika kikao cha ujirani mwema jijini  Mbeya kujadili namna ya kuondoa vikwazo vya kibiashara baina ya Tanzania na mataifa jirani pamoja na ulinzi wa mipaka ya nchi ikiwemo Mbeya ambayo ndio mwenyeji, Songwe, Rukwa, Njombe, Iringa, Ruvuma, Katavi pamoja na Tabora ambayo walikuwa wageni waalikwa.