Wananchi Watakiwa Kulinda Miundombinu ya Maji

Imetumwa : March 23rd, 2021

Mkuu wa Mkuu wa Mbeya Mhe Albert Chalamila amewataka wananchi wake kuwa walinzi wa miundombinu katika miradi ya maji inayopelekwa katika maeneo yao huku wakitambua na kuzingatia kuwa, lengo la Serikali ni kuboresha maisha yao kwa kuwasogezea huduma.

Alisema hayo alipozungumza na wakazi wa kijiji cha Lugombo, kata ya Kandete katika Halmashauri ya  Busokelo wilayani Rungwe akiwa ziara ya kukagua mwendelezo wa ujenzi wa Mradi wa Maji wa Mwakaleli 1 Skimu ya Ndala unayotekelezwa kwa akaunti ya dharura.

Alisema kuwa kumekuwa na kasumba ya baadhi ya watu kuhujumu miundombinu ya miradi ya maji hatua inayorudisha nyuma jitihada za seikali kuwafikishia wananchi huduma bora za kijamii

“ Yapo baadhi ya maeneo hususani yaliyo na wafugaji, watu wanaotumia mishale kutoboa mabomba yanayopitisha maji kupeleka kwa wananchi ili wanyweshe mifugo yao. Sasa kuna wakati tunafikiri  na wao tutumie mishale hiyo hiyo kuwatoboa ili tuwaulize kuna maumivu kiasi gani” alisema Mkuu wa Mkoa

Akaongeza “ Tutambue kuwa serikali imedhamiria wananchi kuondokana na tatizo la maji..Vyanzo vya maji tunavyo, lakini maji hatujayaweka vizuri ili yafike kwa wananchi, wapo watu wachache wanaotaka kutukwamisha: tuseme hapana” Chalamila

Awali, Kaimu Meneja wa Mamlaka ya Usambazaji Maji Vijijini (RUWASA) Paul Kambona alisema, mwanzoni mradi huo katika skimu ya Ndala ulikuwa unatekelezwa na RUWASA kwa usimamizi wa wilaya baada ya mkandarasi kusuasua

Alisema Skimu ya Ndala ina vijiji vinane na mradi unatarajiwa kunufaisha wakazi 12,217. Hadi sasa ujenzi wa chanzo umekamilika na sasa shughuli inayoendelea ni uchimbaji mitaro kwa ajili ya kuanza kulaza mabomba.

Alizitaja changamoto zinazokwamisha mradi huo kuwa ni pamoja na ubovu wa barabara kuelekea mahali kilipo chanzo vha maji unaosababisha kushindwa kufikisha mabomba kutokana na mvua nyingi zinazoendelea kunyesha wilayani hapa.